我估我都應該係行緊好運，基本上我一年之內冇幾多個星期係會咁平靜既．一向本王都唔係個運氣好既人，正所謂每日返工可以”小小心心出門去，安安全全回家來”己經可以還得神落，唔好諗住係街執到錢．難得呢幾個禮拜都冇點遇到ｄ特別倒霉既事，我真係覺得就快輪到我中六合彩.......

七月尾睇ｏ左時代廣場既王永玉作品展，錯過ｏ左之前於藝術中心既展覽的確令我後悔不已．是次展出既展品雖然比之前於藝術中心所展出之作品為少，但己令本王大開眼界，大師之作的確令人拜服．

八月初F小姐搞船河．是日風和日麗，清山綠水，好係一個出海暢遊既好日子．滑下水，玩下浮潛，食下野，曬下太陽又一日，玩完個個黑黑實實．

新主管上場，暫時未對工作做成好大影響......希望以後都唔好有太大既影響．

新project終於正式開工，雖然好多地方都並未十分滿意，但既然已經開始，想退後亦己經太遲，就由呢一刻開始一直向前衝吧！

沈寂數年，美術部格林波治又再開幕．由插畫部李先生發起，再經一兩名好事之徒四處扇風點火，激發起一眾美術部雄性動物戰鬥既本能，各戰士都將佢地靈魂注入佢地既戰鬥工具中.......RC電動搖控車．由數年前既小貓三四人，最終壯大到今時今日十多人參與既大型賽事（對於我黎講的確係大型嫁啦）．比賽當日各車手既技術可以用百花齊放黎型容，技術型既勁！超技術型既仲勁......係炒得好勁！特別鳴謝R先生當日義務客串Racing Girl一角．

雖然生活中總會有ｄ事往往未能盡如人意，但冇壓力既生活的確係令人比較樂觀同輕鬆既，有如係2007年既夏天放ｏ左一個要返工既暑假.......