唔知點解見到"救參"呢兩個字，我會諗起辛辣國出品既高麗參。張poster亦都係比較特別，只要用photoshop執走支鎗，呢張相可以用黎做男仕時裝既廣告。男主角里安納遜，印像中佢都好似未做過呢類動作片，仲要佢一把既年紀，好懷疑佢做到Ｄ咩動作......點知......

好好睇喎！呢舖又比我博到。九十分鐘冇冷場就未必真既，但都有成八十八分鐘係好精彩既。故事一條線直去，起承轉合完全通順，爽！人到中年，諗住唔做特工，番屋企培下老婆同個女，點知反而係老婆同女都跟佬走左。事業又玩完，一條老狗，個女同前妻又唔多ＳＯ佢。自己空有一身本領，但到頭黎只係做個保安，真係幾悲。直到個女比人賣豬仔，男主角為左救番個女，成個人變番個超級特工：利用番之前做特工既情報網，對恐佈分子所用既技能，清脆利落既殺人手法（咁先似番個特工家麻！有時Ｄ戲講完成分鐘對白，但都係殺唔落手，轉頭仲比人捉番轉頭.....唉）。特別係個女被捉既一幕，非常緊湊！不過相對於一幕幕既動作場面，我反而更鐘意佢寫父親對女兒既關心同肉緊既心情。就算個女平時對個老豆幾唔好，但一有事發生，做老豆既為左個女火裏火去，水裏水去，直頭反轉埋成個巴黎，有咩做唔出。