真係越睇得多，就越覺得好好睇既電影睇一部就少一部。如果硬係要揾一套由頭到尾都冇冷場，又要有深度，又要娛樂性十足既電影先走去睇既話，不如係瞓多覺，發多兩個春夢仲化算。又見好多人未睇套戲己經可以彈足幾百字 - 睇完先黎噏啦。查實係咪一彈就要彈到盡，定話都可能有Ｄ野可以執得番呢？

首先講下我呢期睇過既電影，係咁二數幾套出黎：

龍珠之全新進化：睇過既都鬧過，未睇過既都鬧左，我都鬧埋一份。你話佢唔似龍珠？佢又有好多龍珠既元素。但撈埋一齊就完全唔係果回事。如果話佢係一套科幻格鬥青春校園溝女片其實係講得通，但都係一套好鬼爛既校園溝女片。鬼佬拍學生妹個個都好似性飢渴咁，見到樣好Ｄ既男生都係食之而後快。而校園片既男生大部份都係好心急要破左個處，如似美國處男等等既一系列既作品。差唔多套套都係果個模，然後換左男女角，加少少唔同背景，結局人人有野搞......

17 again：又係校園片，呢套好多人話好睇，我又唔覺得佢好得去邊喎？幾套舊片炒埋一碟，不過起碼唔難睇，成套戲仲好通順添，但唔多笑得出。

變型金剛2：其實真係唔差喎，我真係收貨。唔好話第一集有幾好，一套還一套。第二集既場面真係唔比第一集差，有幾場的確係打得賞心悅目。又有人話打鬥場面好似幾舊爛鐵撞來撞去，對唔住，我睇得好清楚。自從珍珠港之後，我對Ｍicheal Bay既文場處理己經冇晒期望，佢求其叫做講得通個故事已經可以還神。仲無啦啦走個未來戰士出黎客串，真係唔知想點。但佢既動作場面往往都好出色，睇既時候千其不能捉錯用神。

未來戰士2018：個故事一早己經講唔通啦，去到第二集就好完鬼左佢，拍到家下真係好夾硬黎。睇完發覺唔只個故事講唔通，有Ｄ場口直頭反智過蒙面超人。但呢類動作特技片當然要着眼於動作特技啦，呢方面基本上係冇咩問題，整體緊緊合格既燒銀紙電影。

血戰新世紀："吸血新世紀"又黎個"血戰新世紀"，呢兩套野真係眼快Ｄ都會撈亂。好心Ｄ片商改中文電影名果時比番多Ｄ心機，唔好下下都剩係"未世xxx"，"xx風雲"咁啦，有時齍望個名，睇左未都唔知......講番電影，又係比人鬧到九彩，戲院版本被cut到九唔答七，但我睇到既版本又好齊全喎。手手腳腳斬到周圍飛，唔好理佢劇情，總之十句唔埋，七句就mon刀，有幾場其實真係打得唔錯。飛來飛去既場口，拍得比好多港產既所謂大片黎得實淨。全片Ｂ到爆，當佢Ａ級片睇真係自己攞黎鬧。完全冇期望之下反而有少少安慰。

浮生路：好好睇，但又有幾多人會睇？如果Titanic男主角阿Jack唔洗死，去到美國同肥温結埋婚生埋仔，個結局會唔會係咁？睇完後望下我主人......好彩佢冇咩理想。肥温係The Reader 攞左個影后，但我又覺得呢套戲既肥温比The Reader表現得更出色喎。

講住咁多先，如果唔係打到成本通聖咁多字都噏唔完。

精彩既電影，沙石自然少，但係咪由頭到尾都係咁好睇，咁又未必。好似浮生路咁，的確係好片，但節奏慢。如果撞啱睇果日公司多野做，又要睇九點半既話，開場未到十五分鐘就可以瞓着。爛如血戰新世紀呢類Ｂ級血肉橫飛電影，結尾爛到唔洗恨，但如果剩係睇打鬥場面又唔係咁差。故事橋段係咪要下下扭到條麻繩咁複雜呢？又未必。夾硬黎扭分分鐘收唔到尾仲大件事。又如17 again咁，炒炒埋埋個幾鐘，簡簡單單靚仔靚女，睇完都得個開心。又要動作爆破真功夫ＣＧ強勁緊張加娛樂性豐富，然後又要感人愛情賺人熱淚加發人深醒，埋尾黎個出人意表夾估你唔到，咁既戲揾到就唔該單聲。睇套戲都係個幾兩個鐘姐，上下網睇下Ｄ爛劇發下牛𢭃都唔見左啦。睇完出黎比少少時間諗一諗，唔好既咪算數，好既就袋埋佢，唔係下下黎個一刀切，然後就close file既。

估唔到打下打下又打左咁多字出黎，但冇心機改，原文照出。 埋尾都係黎多句：以上完全個人意見，不喜勿插。